Terminologia occitana

Lo Conselh de la lenga occitana ven de publicar una sintèsi de granda qualitat que règla un fum de problèmas e subretot que corregís un plamponh d'incoeréncias de la "nòrma" d'Alibèrt.
Aquel document elaborat per Domergue Sumien comença per una introduccion de Patric Sauzet. Cal tornar dire la granda qualitat d'aqueles dos òmes, linguistas de tria, e tanben lor granda volontat de far avançar la normativizacion de la lenga malgrat las empachas, las capelas e totes los arganhòls codificaires autoproclamats.
Un pichon repròche, lo pes del document PDF, que n'empacha la consultacion "en linha" pel monde coma ieu qu'an pas lo naut debit a l'ostal.
Aquel document l'avètz sul site de la revista Linguistica occitana, e tanben sus lo de Gianni Vacca, qu'aviá ja publicadas las primièras preconizacions.

Soi a acabar una adaptacion a l'occitan de la terminologia informatica de Termcat. Una de la demandas de l'IEO es de redusir lo nombre de mots a 400. N'i a pas gaire de tròp, en gròs 600. Me diguèri que caliá defugir las repeticions. Per exemple, es evident que l'anglés function dona funció en catalan, foncion en occitan, fonction en francés. Tirèri tanben de tèrmes ja passats de mòda, que deguns utiliza pas mai. E n'arribèri a 360... Soi a acabar la mesa en pagina, vos balharai lo fichièr "brut" aicí, lo fichièr esporgat serà mandat a l'IEO.